ھىندىستان بىلەن ياۋروپا ئىتتىپاقى توققۇز يىللىق ئۈزۈلۈشتىن كېيىن ئەركىن سودا كېلىشىمى توغرىسىدىكى سۆھبەتنى قايتىدىن باشلىدى

ھىندىستان سانائەت ۋە سودا مىنىستىرلىقى پەيشەنبە كۈنى ھىندىستان بىلەن ياۋروپا ئىتتىپاقى توققۇز يىللىق توختاپ قېلىشتىن كېيىن ئەركىن سودا كېلىشىمى سۆھبىتىنى قايتىدىن باشلىغانلىقىنى بىلدۈردى.

ھىندىستان سودا ۋە سانائەت مىنىستىرى پىيۇش گويال ۋە ياۋروپا كومىتېتىنىڭ ئىجرائىيە مۇئاۋىن رەئىسى ۋالدىس دومبروۋىسكى 17-ئىيۇن كۈنى ياۋروپا ئىتتىپاقىنىڭ باش ئورگىنىدا ئۆتكۈزۈلگەن پائالىيەتتە ھىندىستان-ياۋروپا ئىتتىپاقى ئەركىن سودا كېلىشىمى توغرىسىدىكى سۆھبەتلەرنىڭ رەسمىي قايتا باشلانغانلىقىنى جاكارلىدى، دەپ خەۋەر قىلدى NDTV. ھىندىستان سودا ۋە سانائەت مىنىستىرلىقىنىڭ بىلدۈرۈشىچە، ئىككى تەرەپ ئوتتۇرىسىدىكى تۇنجى قېتىملىق سۆھبەت 27-ئىيۇن كۈنى يېڭى دېھلىدا باشلىنىشى پىلانلانغان.

بۇ، ھىندىستان ئۈچۈن ئەڭ مۇھىم ئەركىن سودا كېلىشىملىرىنىڭ بىرى بولۇپ قالىدۇ، چۈنكى ياۋروپا ئىتتىپاقى ئامېرىكىدىن قالسىلا ئۇنىڭ ئىككىنچى چوڭ سودا شېرىكى. يېڭى دېھلى: ھىندىستان بىلەن ياۋروپا ئىتتىپاقى ئوتتۇرىسىدىكى تاۋار سودىسى 2021-2022-يىللىرى 116 مىليارد 360 مىليون دوللارغا يېتىپ، يىللىق نىسبىتى %43.5 ئاشتى. ھىندىستاننىڭ ياۋروپا ئىتتىپاقىغا ئېكسپورتى 2021-2022-مالىيە يىلىدا %57 ئېشىپ 65 مىليارد دوللارغا يەتتى.

ھىندىستان ھازىر ياۋروپا ئىتتىپاقىنىڭ 10-چوڭ سودا شېرىكى بولۇپ، ئەنگىلىيەنىڭ «برېكىست» تىن بۇرۇنقى ياۋروپا ئىتتىپاقىنىڭ بىر تەتقىقاتىدا ھىندىستان بىلەن سودا كېلىشىمىنىڭ 10 مىليارد دوللارلىق پايدا ئېلىپ كېلىدىغانلىقى ئېيتىلغان. ئىككى تەرەپ 2007-يىلى ئەركىن سودا كېلىشىمى توغرىسىدا سۆھبەت باشلىغان، ئەمما ماشىنا ۋە ھاراققا تاموژنا بېجى مەسىلىسىدە پىكىر ئىختىلاپى سەۋەبىدىن 2013-يىلى سۆھبەتنى توختىتىپ قويغان. ياۋروپا كومىتېتىنىڭ رەئىسى ئۇرسۇلا ۋون دېر لېيېننىڭ ئاپرېلدا ھىندىستانغا قىلغان زىيارىتى، ھىندىستان پرېزىدېنتى نارېندرا مودىنىڭ مايدا ياۋروپاغا قىلغان زىيارىتى ئەركىن سودا كېلىشىمى توغرىسىدىكى مۇزاكىرىلەرنى تېزلىتىپ، سۆھبەتلەر ئۈچۈن يول خەرىتىسىنى بېكىتتى.